ਹਿਮਾਚਲ ਪ੍ਰਦੇਸ਼ ਵਿੱਚ ਮੀਂਹ ਕਾਰਨ ਆਮ ਜਨਜੀਵਨ ਪ੍ਰਭਾਵਿਤ ਹੋਇਆ ਹੈ। ਰਾਜ ਵਿੱਚ ਮੀਂਹ ਕਾਰਨ 55 ਖੇਤਰਾਂ ਵਿੱਚ 150 ਸੜਕਾਂ, 334 ਬਿਜਲੀ ਸੇਵਾਵਾਂ ਅਤੇ ਜਲ ਸਪਲਾਈ ਸੇਵਾਵਾਂ ਵਿੱਚ ਵਿਘਨ ਪਿਆ ਹੈ। ਭਾਰੀ ਮੀਂਹ ਦਾ ਸਭ ਤੋਂ ਵੱਧ ਅਸਰ ਜ਼ਿਲ੍ਹਾ ਮੰਡੀ ਵਿੱਚ ਦੇਖਣ ਨੂੰ ਮਿਲਿਆ ਹੈ। ਮੰਡੀ ਦੀਆਂ ਵੱਖ-ਵੱਖ ਸਬ ਡਵੀਜ਼ਨਾਂ ਵਿੱਚ ਕੁੱਲ 111 ਸੜਕਾਂ ਬੰਦ ਹੋ ਗਈਆਂ ਹਨ। ਜੇਕਰ ਜ਼ਿਲ੍ਹੇ ਦੇ ਅੰਕੜਿਆਂ ‘ਤੇ ਨਜ਼ਰ ਮਾਰੀਏ ਤਾਂ ਚੰਬਾ ਜ਼ਿਲ੍ਹੇ ‘ਚ ਕੁੱਲ ਅੱਠ ਸੜਕਾਂ ਬੰਦ ਹਨ। ਕਾਂਗੜਾ ਜ਼ਿਲੇ ਦੇ ਇੰਦੌਰਾ ‘ਚ ਪੁਲ ਦੇ ਰੁੜ੍ਹ ਜਾਣ ਕਾਰਨ ਆਵਾਜਾਈ ‘ਚ ਵਿਘਨ ਪਿਆ ਹੈ।
ਇਸ ਤੋਂ ਇਲਾਵਾ ਜ਼ਿਲ੍ਹਾ ਕੁੱਲੂ ਵਿੱਚ ਅੱਠ ਥਾਵਾਂ ’ਤੇ ਸੜਕਾਂ ਬੰਦ ਕਰ ਦਿੱਤੀਆਂ ਗਈਆਂ ਹਨ। ਜ਼ਿਲ੍ਹਾ ਸ਼ਿਮਲਾ ਵਿੱਚ 9 ਥਾਵਾਂ ਅਤੇ ਜ਼ਿਲ੍ਹਾ ਸਿਰਮੌਰ ਵਿੱਚ 13 ਥਾਵਾਂ ’ਤੇ ਸੜਕਾਂ ’ਤੇ ਲੋਕਾਂ ਦੀ ਆਵਾਜਾਈ ਠੱਪ ਹੋ ਗਈ ਹੈ। ਜੇ ਜ਼ਿਲ੍ਹਾ ਮੰਡੀ ਦੀ ਗੱਲ ਕਰੀਏ ਤਾਂ ਸੁੰਦਰਨਗਰ ਵਿੱਚ ਪੰਜ, ਸਿਰਾਜ ਵਿੱਚ 14, ਥਲੌਟ ਵਿੱਚ 22, ਮੰਡੀ ਵਿੱਚ ਤਿੰਨ, ਨੇਰਚੌਕ ਵਿੱਚ ਇੱਕ, ਜੋਗਿੰਦਰਨਗਰ ਵਿੱਚ 10, ਪਧਰ ਵਿੱਚ 14, ਗੋਹਰ ਵਿੱਚ ਤਿੰਨ, ਧਰਮਪੁਰ ਵਿੱਚ 25, ਸਰਕਾਘਾਟ ਵਿੱਚ ਨੌਂ ਅਤੇ ਕਾਰਸੋਗ ਵਿੱਚ ਪੰਜ ਸੜਕਾਂ ਬੰਦ ਹਨ। ਇਸ ਤਰ੍ਹਾਂ ਜ਼ਿਲ੍ਹਾ ਮੰਡੀ ਵਿੱਚ ਕੁੱਲ 111 ਥਾਵਾਂ ’ਤੇ ਸੜਕਾਂ ਬੰਦ ਕੀਤੀਆਂ ਗਈਆਂ ਹਨ।
ਦਸ ਦੇਈਏ ਕਿ ਚੰਬਾ ਜ਼ਿਲ੍ਹੇ ‘ਚ 58 ਥਾਵਾਂ ‘ਤੇ ਬਿਜਲੀ ਸੇਵਾ ਪ੍ਰਭਾਵਿਤ ਹੋਈ ਹੈ। ਇਨ੍ਹਾਂ ਵਿੱਚ ਤੀਸਾ ਵਿੱਚ 10, ਭਰਮੌਰ ਵਿੱਚ 8 ਅਤੇ ਚੰਬਾ ਉਪ ਮੰਡਲ ਵਿੱਚ 40 ਸਥਾਨ ਸ਼ਾਮਲ ਹਨ। ਇਸ ਤੋਂ ਇਲਾਵਾ ਜ਼ਿਲ੍ਹਾ ਮੰਡੀ ਵਿੱਚ 259 ਥਾਵਾਂ ’ਤੇ ਬਿਜਲੀ ਸੇਵਾ ਠੱਪ ਹੋ ਕੇ ਰਹਿ ਗਈ ਹੈ। ਊਨਾ ਜ਼ਿਲ੍ਹੇ ਦੇ ਅੰਬ ਵਿੱਚ 17 ਥਾਵਾਂ ’ਤੇ ਬਿਜਲੀ ਨਹੀਂ ਹੈ। ਮੰਡੀ ਵਿੱਚ 12, ਗੋਹਰ ਵਿੱਚ 86, ਕਾਰਸੋਗ ਵਿੱਚ ਇੱਕ, ਸਰਕਾਘਾਟ ਵਿੱਚ ਤਿੰਨ, ਧਰਮਪੁਰ ਵਿੱਚ 154, ਸੁੰਦਰਨਗਰ ਵਿੱਚ ਇੱਕ ਅਤੇ ਜੋਗਿੰਦਰਨਗਰ ਵਿੱਚ ਦੋ ਥਾਵਾਂ ’ਤੇ ਬਿਜਲੀ ਸੇਵਾ ਠੱਪ ਹੈ। ਬਿਲਾਸਪੁਰ ਜ਼ਿਲ੍ਹੇ ਵਿੱਚ 22 ਥਾਵਾਂ ਅਤੇ ਸ਼ਿਮਲਾ ਜ਼ਿਲ੍ਹੇ ਵਿੱਚ 33 ਥਾਵਾਂ ’ਤੇ ਪਾਣੀ ਦੀ ਸਪਲਾਈ ਵੀ ਪ੍ਰਭਾਵਿਤ ਹੋਈ ਹੈ।
ਗੌਰਤਲਬ ਹੈ ਕਿ ਮੌਸਮ ਵਿਗਿਆਨ ਕੇਂਦਰ ਸ਼ਿਮਲਾ ਨੇ ਸੂਬੇ ਵਿੱਚ 12 ਜੁਲਾਈ ਤੱਕ ਮੌਸਮ ਖਰਾਬ ਰਹਿਣ ਦੀ ਭਵਿੱਖਬਾਣੀ ਕੀਤੀ ਹੈ। ਇਸ ਸਬੰਧੀ ਯੈਲੋ ਅਲਰਟ ਜਾਰੀ ਕੀਤਾ ਗਿਆ ਹੈ। ਪਿਛਲੇ 24 ਘੰਟਿਆਂ ਦੀ ਗੱਲ ਕਰੀਏ ਤਾਂ ਰੇਕੋਂਗੱਪੀਓ ਵਿੱਚ ਸਭ ਤੋਂ ਘੱਟ ਤਾਪਮਾਨ 6.9 ਡਿਗਰੀ ਅਤੇ ਚੰਬਾ ਵਿੱਚ ਸਭ ਤੋਂ ਵੱਧ 34.1 ਡਿਗਰੀ ਦਰਜ ਕੀਤਾ ਗਿਆ।
